भारताचा पहिला ऑफशोअर विमानतळ होणार वाढवण येथे!
मुख्यमंत्री फडणवीस यांनी केली घोषणा, प्रकल्प 2026 पर्यंत सुरू होण्याची शक्यता
वाढवण बंदराशी जोडलेला भारतातील पहिलाच ऑफशोअर (समुद्रातील) विमानतळ उभारण्याची घोषणा मुख्यमंत्री देवेंद्र फडणवीस यांनी पंतप्रधान नरेंद्र मोदी यांच्या उपस्थितीत केली आहे. हा महत्त्वाकांक्षी प्रकल्प 2026 पर्यंत कार्यान्वित होईल, अशी अपेक्षा व्यक्त करण्यात आली आहे.
मुंबई महानगर प्रदेशातील हा तिसरा विमानतळ ठरणार असून, सुमारे ₹76,220 कोटी रुपयांचा हा प्रकल्प महाराष्ट्राच्या पायाभूत विकासाचा आणि नवतंत्रज्ञानाचा नवा अध्याय ठरेल. राज्य सरकारने या प्रकल्पाचा सविस्तर अहवाल (DPR) तयार करून मंत्रिमंडळाची मंजुरी घेतली आहे, तर पुढील 20 दिवसांत निविदा प्रक्रिया सुरू होणार आहे.
हा विमानतळ उभारण्यामागचा उद्देश म्हणजे मुंबईतील वाढत्या विमानवाहतुकीवरील ताण कमी करणे आणि वाढवण बंदराच्या विकासाला गती देणे हा आहे. प्रकल्पाची अंमलबजावणी वाढवण पोर्ट प्रोजेक्ट लिमिटेड, जवाहरलाल नेहरू पोर्ट अथॉरिटी आणि महाराष्ट्र मेरीटाइम बोर्ड यांच्या संयुक्त उपक्रमातून केली जाणार आहे. यामुळे पालघर जिल्ह्याच्या आर्थिक आणि औद्योगिक प्रगतीला मोठा हातभार मिळेल.
मुख्यमंत्री फडणवीस यांनी सांगितले की, समुद्रावर आधारित हा विमानतळ “चौथ्या मुंबईच्या विकासाचे केंद्र” ठरेल. वाढवण येथील खोल समुद्र आणि मुंबईशी असलेली सुलभ जोडणी ही निवडीमागील प्रमुख कारणे असल्याचे त्यांनी स्पष्ट केले. सध्या छत्रपती शिवाजी महाराज आंतरराष्ट्रीय विमानतळावर एकाच धावपट्टीवर ताण वाढला आहे, त्यामुळे नवी मुंबई आणि वाढवण ही दोन नवी केंद्रे विमानवाहतुकीसाठी मोठी मदत ठरणार आहेत.
सध्या प्रकल्पाच्या प्राथमिक अभ्यासाला सुरुवात झाली असून, समुद्रातील धावपट्टीसह पर्यावरणीय आणि तांत्रिक बाबींचा सखोल विचार सुरू आहे. पहिल्या टप्प्यातील ₹6,200 कोटींच्या कामाला हिरवा कंदील मिळाला आहे.
हा प्रकल्प नियोजित वेळेत पूर्ण झाल्यास, वाढवण ऑफशोअर विमानतळामुळे मुंबईची विमान वाहतुकीची क्षमता वाढेल आणि हा प्रदेश एक नवीन आर्थिक व लॉजिस्टिक केंद्र म्हणून उदयास येईल. बंदर आणि विमानतळ या दुहेरी प्रकल्पामुळे महाराष्ट्राची आर्थिक राजधानी नव्या उंचीवर झेप घेणार आहे.